በሃሰተኛ የትምህርት ማስረጃ የተቀጠሩ ሊባረሩ ነው

የአዲስ አበባ ከተማ አስተዳደር በሐሰተኛ የትምህርት ማስረጃ የተቀጠሩ ሠራተኞችን እመነጥራለሁ አለ

ውድነህ ዘነበ – የአዲስ አበባ ከተማ አስተዳደር በሐሰተኛ የትምህርት ማስረጃ አጭበርብረው የተቀጠሩ ሠራተኞችን ለመመንጠር አዲስ ዕቅድ አወጣ፡፡

የአዲስ አበባ ፐብሊክ ሰርቪስና የሰው ሀብት ልማት ቢሮ በሁሉም መሥሪያ ቤቶች ይህንን የሚሠራ ኮሚቴ ያቋቋመ ሲሆን፣ በማዕከል ደረጃ ፖሊስና ፍትሕ ቢሮ ያሉበት ግብረ ኃይል አቋቁሟል፡፡
ቢሮው ሒደቱ የሚመራበትን መመርያ በማዘጋጀት በማዕከል፣ በክፍለ ከተማና በወረዳ መዋቅሮች ከሚመለከታቸው ጋር ሲመክር ቆይቷል፡፡

በዚህ መሠረት ኮሚቴዎቹ ከታኅሳስ 11 ቀን 2010 ዓ.ም. ጀምሮ ሥራቸውን እንደሚጀምሩ፣ ሥራው ሦስት ምዕራፎችን እንደያዘ ለማወቅ ተችሏል፡፡
ከታህሳስ 11 ቀን 2010 ዓ.ም. ጀምሮ በየመሥሪያ ቤቱ በሐሰተኛ ሰነድ ሁነኛ ቦታ ይዘው የሚገኙ ሠራተኞችና ኃላፊዎች በፈቃደኝነት ራሳቸውን እንዲያጋልጡ ዕድል ይሰጣቸዋል ተብሏል፡፡

ይህ ራስን የማጋለጥ ጉዳይ ለአንድ ወር የሚቆይ ሲሆን በወሩ ጥር 11 ቀን 2010 ዓ.ም. ጀምሮ ደግሞ የጥቆማ ሳጥን ተዘጋጅቶ አውጫጭኝ እንደሚጀመር ተሰምቷል፡፡
ይህም ለአንድ ወር ከቆየ በኋላ ከየካቲት 11 ቀን 2010 ዓ.ም. ጀምሮ ኮሚቴው የትምህርት ማስረጃዎችን መመርመር ይጀምራል፡፡
ሒደቱ የይቅርታ ጊዜው ያለው ሲሆን፣ በይቅርታ ጊዜው ያልተጠቀሙ ወደ ተጠያቂነት እንደሚሸጋገሩ ተገልጿል፡፡

ሃሰተኛ የትምህርት ማስረጃ
በአዲስ አበባ ከተማ አስተዳደርና በሥሩ በሚገኙ መሥሪያ ቤቶች በአጠቃላይ 105 ሺሕ ሠራተኞች እንደሚገኙ መረጃዎች ያመለክታሉ፡፡
በትክክለኛ የትምህርት ማስረጃ ቦታ የያዙ እንዳሉ ሁሉ በሐሰተኛ የትምህርት ማስረጃ የማይገባቸውን ሁነኛ ቦታ የያዙ መኖራቸውን፣
የአዲስ አበባ ፐብሊክ ሰርቪስና የሰው ሀብት ልማት ቢሮ አስታውቋል፡፡

‹‹ቁጥራቸው ቀላል የማይባል ሠራተኞች በሐሰተኛ የትምህርት ማስረጃ የማይገባቸውን ቦታ ይዘዋል፡፡
ይህም በከተማ ውስጥ እየተፈጠረ ላለው የመልካም አስተዳደር ችግር አንዱ ምክንያት ነው፤››
ሲሉ፣ የአዲስ አበባ ከተማ ፐብሊክ ሰርቪስና የሰው ሀብት ልማት ቢሮ ተጠባባቂ ምክትል ዋና ሥራ አስኪያጅ አቶ መላኩ ተመሥገን ለሪፖርተር ገልጸዋል፡፡

በፌዴራል ደረጃ የፐብሊክ ሰርቪስና የሰው ሀብት ልማት ሚኒስቴር ባካሄደው ዳሰሳ፣
በሐሰተኛ የትምህርት ማስረጃ የማይገባቸውን ቦታ የያዙ ሠራተኞችና ኃላፊዎች መኖራቸው ተረጋግጧል፡፡

በፌዴራል ደረጃ ከአምስት ሚሊዮን በላይ ሠራተኞች የሚገኙ ሲሆን፣
ማዕከላዊው መንግሥት አጭበርብረዋል በሚባሉ ላይ ዕርምጃ እንዲወሰድ ትዕዛዝ መስጠቱ ታውቋል፡፡
በዚህ መሠረት የአዲስ አበባ ከተማ አስተዳደር ዕርምጃ መውሰድ የሚያስችለውን ሥራ ሲሠራ የቆየ በመሆኑ፣
በሚወስደው ዕርምጃ ይቅርታና ተጠያቂነት ጉልህ ሥፍራ መያዛቸው ታውቋል፡፡

የኦሮሚያና የአማራ ክልሎች ቀደም ብለው ዕርምጃ መውሰዳቸው ይታወቃል፡፡

ሃሰተኛ የትምህርት ማስረጃ

Leave a Reply

Your email address will not be published. Required fields are marked *